Gen 15 | NSS | STEP | Iyamulan Yapan iwong iya kili Aparam iya taltal, pe ipwai iyatan ipa, “Aparam, mbunanoh. Andre kupenani wou iya sehe mwomwan kisarayah kili wou, pe andre kurapayam kiya memelit soyon iya.”

Genesis 15

Ngindrai irapaniu iyapolo Aparam

1 IyamulanYapan iwong iya kili Aparam iya taltal, pe ipwai iyatan ipa,

“Aparam, mbunanoh.
Andre kupenani wou iya sehe mwomwan kisarayah kili wou,
pe andre kurapayam kiya memelit soyon iya.”
2 Hapeko Aparam ihilingiy pe ipa, “O,Yapan Ngindrai, wou naiki tesah ndrokonan kisa to? Konan. Yo noru pwi pe melto masikene iripo andre sehe ndramat maran kiro aliy? Yo ndramiro hamou o ara Eliyeser para kol Tamaskus. 3 Pe anhang yo hamou mbunah pwi. Pwen andre ndramat ara para poya mbulyo andre maran kiro melto masih.”

4 Pwen pe Aparam ihilingiYapan iwong iya kili yiy paiwe ipa, “Ndramat para poya mbulyam ara andre kinwiri meltam masikene pwi yoh. Norum, ndreyem imwonen andre kiwiri nokum pe kinimnim kiya meltam masih.” 5 PwenYapan iwiri yiy iya ngawan pe ipwai iyatan ipa, “Maram kiya paingan pe anime hu piriy masih hora yang. Alahi andromwa hu? Pwi yoh! Tehen tora ko ndrayem hu andre karayah tehen aliy.”

6 Aparam ihilingiy pe ilohongani tisingi nongnaYapan ara ndrokonan masih. Pwen peYapan ipohowe Aparam ara ndramat hamou imwonen masih.

7 PwenYapan ipwai iyatan ipa, “YoYapan mepo uwiri wou asa mawen kol Ur, ita nondriya kol namandran Kaltiya, para kuiki pwan iye kisatam pe kiya pwenem.”

8 Hapeko Aparam ipwai iyatan ipa, “Yapan Ngindrai, yo andre kupahasaniy tehe tapeh mepo pwan aro nakiya mbukenan yo?”

9 PwenYapan ipwai iyata Aparam ipa, “Aya wiri mbulmwakau hamou pihin, meme hamou, pe sipsip hamou kamai, hu kan masih, ara hayou tahu maroyoh, pe kiyasura pai malmou.” 10 Aparam iya wiri hu kan masih teheYapan ipwai iyatan, pe iwiri hu isa kili yiy. Pwen iralle hu iya maltoh pe iyki hu haroh iya sahin pe haroh iya sahin, haroh iye ngilse haroh, pe hilu pai o ara kintalle hilu pwi. 11 Pwen hu mannah tiken huwoh husa pwan pakasa sap ana hu, hapeko Aparam imbultahahu pe huwoh.

12 Lang ara paramwandrai pakeh nakiyalai, pe matiliu irayi Aparam, pe iye pwan pe imatin turut. Pwen inime melit handra mburuhan-mburuhan isarayah isa kili yiy tehe nihinih pe inohowani yiy. 13 PwenYapan iwong iya kili yiy ipa, “Wou apahasaniy tehe ndrayem hu andre kampwan kol hakol mepo kolohu pwi, pe andre kapo mbulen kiya pahandra hu ndramat para kol ara. Pe andre hu kaya pwandrendres tahu, pe hu ndramat para kol ara andre hu karandrondroyani ndrayem hu kipo hayou mahaangat. 14 Kiya mulan andre kurakultuwani hu ndramat masih para kol namandran ara kiya mwomwan masih. Pe kamulan paraliy andre ndrayem hu kasa mawen kol namandran ara kiyasura meltahu soyon iya. 15 Pe wou ara andraya parangoloh masih, pe kimat tam ara andre kisarayah waison o. Pe norum hu andre hu karoni wou oho ndruwa tamam pe tumbum hu. 16 Pwen kiya mulan masih ndrayehu mahaasap andre hu kamui kasa kol aripo. Hapeko mahapo ara, takultuw mwomwan tahu Amor ara hiramwak ndron.”

17 Paramwandrai kinna lai pe kol kinlokuh, pwen Aparam inime kosumwan irotinam kohoyonga mwan, pe mwan iro yat paisui. Melit malndra ara hilu ro yau mwelenga hu kan mepo kintalle hu pwen huro pwan. 18 Iro mwonen lang araYapan ipwai iyata Aparam ipa, “Mahapo talu nakaramwaniye kiya hiyan —- tehe yo andre kuiki pwan kiro matine Ndran Yisip kiya matine Ndran Namandran Yuparates kiyata ndrayem hu. 19 Pwan ara mahapo yihu ndramira Ken, Kenis, Katmon, 20 Hit, Peris, Repa, 21 Amor, Kanaan, Kirkas pe Yepus hu yerampwan aliy.”